ساعة حقيقة

 ساعه حقيقه 

ساعة حقيقة 

بقلم الكاتب ياسر عبدو

ولسه بفكر في نفس عقلانية اغلب الشباب والشابات ونظرتهم لاغلب المواضيع،، ليي السهر والطلعات موضه والصدقه وزياره الاهل اداه واجب .

سالت نفسك انا بستفيد شنو لما اساهر لوقت متاخر؟،، في حين انو ممكن تصلي وتنوم بدري ع الاقل راحه بدنيه، واحتمال السهر ينسيك حتي الفرض، فهل الحاجه المساهر ليها اهم من علاقتك مع ربنا؟ .

إقرأ رواية ليالي الرُعب الممتعه

ليي انا ممكن ادفع بقشيش للويتر بحجه الموضه ولما يجيني شحاد بطردو او اقول ليهو ربنا يديك؟ هو فعلا ربنا حايديهو لو ما كان منك حايكون من غير بس طالما بتدفع بقشيش بتقدر تدفع بسيط  للسائل وع الاقل تكون ليك صدقه،  بس للاسف الاغلبيه بفضلو بقشيش الموضه على الصدقه الفيها اجر .

طيب ليي انتي غلبك الشارع وبقيتي مواكبه الموضه بحجه البس البعجب الناس، حتي لو كان البعجبهم ما برضي ربك بس المهم مواكبه الموضه، طيب بعد تنتهي الموضه حاتكوني مرتاحه؟ .

طيب طالما دايره تواكبي الموضه في موضه سمحه وجميله والاجمل انها بترضي ربك بس لاسف عند البعض تعقيد حصل جربتيها؟؟ .

ساعة حقيقة 

طالما نحن جهاز تحكم في يد الناس نلبس زي ما دايرين ونشرب زي ما دايرين وين شخصيتنا ودورها؟؟؟ .

طيب فكرت تقيف بعربيتك وتشيل معاك الناس الواقفه في الشارع بدل ما تجي وتتباهي قدامهم بعربيتك، وفي كميه الدعوات البتلقاها منهم بعد ينزلو، إحتمال واحد فيهم اقرب منك لربنا.

هل حصل ختيت نفسك مكانهم فكرت انو ما عندك عربيه وواقف معاهم وجاء زول عمل نفس البتعملو احساسك حايكون كيف؟؟ 

فكرت بدل تمشي الحدايق تكشف وتقضي وقتك وتتصور تعمل حاجه مفيدة، حملة نضافه مثلا، او قروش الرحله دي تعمل بيها وجبه بغض النظر عن نوع الوجبه شنو؟ 

صاح انت حر وبتعمل الدايرو بس فكرت في انو (لقمه في بطن جائع خير من بناء الف جامع) وفي الاجر الحايجيك.

كميه من الطلاب عندهم مشاكل في التعليم سوء كانت ماديه او معنويه فكرت تشوف معاهم الحل؟؟ .

فكرت انو ممكن تدفع رسوم طالب او حتي تساعدو في الواجب لانو انت مريت بالمرحله دي وتشوف كميه الراحه الحاتلقاها؟؟.

ما بتقدر وما عندك امكانيه ممكن تساعد بابسط الحاجات حتي الدعاء وحاتلقي الراحه لما يقول ليك اميين جمعا.

مشيت المستشفي مرافق او غيرو قول الحمد لله وحاول تساعد ااي زول لقيتو محتاج لمساعدة ابقي سند ليهم.

اجمع تبرعات من اهلك واصحابك وحاول اعمل بيهم حاجه مفيدة، خليك انت المبادر دايما لانو نحن كلنا بنقدر نعمل كدا بس محتاجين الببادر لينا بالموضوع.

حاجات كتيره بنشوفها صغيره وما بنفكر في الاثر بتاعها، ما تقييد اطلع والعب واعمل ااي شي بس في نص يومك خلي اثر حتي لو صغير وخليك متاكد انو حايرجع ليك لو ما اليوم في يوم تاني .

ما نحاول نعاين لنص الكبايه الفاضي خلونا نحن نملي الكبايه عشان ما يكون في نص تاني في حياتنا.

ابقي السند لنفسك وابدا بنفسك.