انظر ماحدث لهذا الشاب في يوم عيد الحب
 |
| عيد الحب |
سلسلة السواقه بالخلاء والدقداق فرع القصص القصيره
لو مغيرين وجاهزين تعالوا اسوقكم بالخلاء
أمسكوا قوي بس ما تقعوا
يوم امس ضبطت المنبه علي الساعه الثالثه صباحاً ،استيغظت من النوم قبل أن يرن المنبه ولم افعل شي بعد أن استيقظت إطلاقا الا وعجلت بالاتصال لها وقلت لها دون أن أسلم عليها أو أقول لها صباح الخير : عزيزتي الساعه سته صباحاً ونحن نكون في مطعم امواج نفطر ونمشي نستلم الهدايا من محل #قفة_فرح لانه امامنا يوم حلو أخاف أن ينتهي سريعاً.
فقالت لي :اوك ، بعد أن نفطر اذهب لوحدك لاستلام الهدايا ام انا س انتظر والدي يصطحبني معه نتسوق ثم نعود اليك.
فهرعت لتجهيز نفسي سريعاً ،،،
"استحميت ٧مرات وثلاته فتايل ريحه كسرتهم اتمسحت بيهم واتنين غسلت بيهم ملابسي وفتيلين شربتهم
وشربت لي فنجان قهوه
المهم بعد جهزت وعاينت في المرايه اربعه مرات طلعت خلاص
ما طالبيني حليفه مشيت مطعم امواج صحيت العمال وولعت ليهم اللمبات وساعدت الزول البمسح السيراميك دا ،والطباخ واشتغلت مع العمال .
قلت عشان انتهوا سريع ،ولاني جيتهم بدري كنت شايف الوقت كانوا واقف ما بيمشي وانا منتظر الساعه ٦دي تجي.
بقي احساسي وانا منتظر ذي احساس الأطفال زماان لم يكون اليوم تيسوعه وصبحان العيد ،بالضبط نفس لهفتم لبداية اليوم ،وقلقهم ،ونومهم من بدري عشان بقولوا اليوم يجي سريع .
وقت جات الساعه ٦ بقيت اعاين مد بصري للطريق ومنتظر ومترقب حبيبتي،،، وطال انتظاري ،والبت ما جات جيت اطلع التلفون اتصل ليها لقيت التلفون نسيتوا في البيت
من الشفقه،بس نسيت التلفون فقلت بقعد بنتظرها بس بتجي انا متاكد انها ح تجي وما عاوزه تذكير باتصال.
المهم قاعد للساعه ١٢في مطعم امواج طلبت مويه صحه قلت عشان ما يطردوني والبت ما جات .
فلم طولت وانا قاعد ،وشايف المحل شبه فاضي
سالت واحد من العمال قلت لي يا زول الليله مالوا المحل هادي كدا يوم عيد الحب دا مفروض يكون زحمه
قال لي عيد الحب بكره يازول
شلت مويتي وقمتا ابلع في ريقي تبلع ،للعلم أنه لم تمشي ليك مشوار في الخرطوم ،لغرض ما وما تتوفق بتحس أنه كانك اتسرقت أو قروشك ضاعت منك ،لانه تعرفة المواصلات بين الأحياء القريبه ذيها وذي تذكرة طيران من الدرجة الأولى ،فما بالك لو جيت مشوار من اخر الخرطوم .
وموجعاني اكتر قارورة المويه الاشتريتها من المحل الـ بـ١٠٠٠ دي وبرا في حفاظه مويه سبيل.تقول موية زمزم.
بعد ماعرفت أنه عيد الحب بكره ،ما اليوم
رجعت البيت بعد معاناه ومجابدة في المواصلات وصلت بعد سله روح لقيت تلفوني مجدوع في السرير شلتوا قلت اكسروا من الزعله على الأقل لو كان معاي كان اتصلت ليها وما كان قعدت الزمن دا كلوا وضيعت يومي في الفاضي.
قلت ما مهم خلاص اتصل ليها اضحك معاها شويه واقول ليها لي غاشاني وركبتيني ماسوره ،ومخلياني اجي المشوار دا كلوا والليله ما عيد الحب.
فتحت سجل المكالمات عشان اتصل ،،ما القي الا رقم الحاج ،واصحابي ود المصطبه ،والمكنه،والجلك ،وكميةارقام أصحاب اسامهيم كلها في المعاجم العربية واللهجات المحلية ما موجوده.
وبعد التفكير العميق اليوم كلوا وتفتيش سجل المكالمات لا خليت مكالمه فايته لا وارده لا شارده وتفتيش رسائل الواتس اب والمسنجر اكتشفت اني اصلا انا ما عندي حبيبه وعيد الحب بكره
وانا في السعودية.
فعرفت أنه كل الحصل لي دا ماهو الا تهيأت وخزعبلات الجفاف العاطفي
فالحمد لله اليوم صحيت الساعه ٩ واليوم هو عيد الحب ،وما عندي شي يقيدني ،ولا شي انتظره .
اتذكرت فنانه قالت انا مالي ومال الرذ باللبن هوي مالي ومال الحيرقان التقول عليو حبيب تلقاهو اصعب من فلان .
التخيلات دي بتجي للشباب كثير جداً ،لانه الارتباط بقي مكلف فما بالكم بالزواج الذي أصبح يمثل عقبة ومعضله حقيقيه تواجه كل شاب .
أقرأ أيضاً:عن أسباب عزوف الشباب عن الزواج